Düýn Aşgabatdaky «Ýyldyz» myhmanhanasynda Amerikanyň Birleşen Ştatlarynyň Türkmenistandaky ilçihanasy tarapyndan ABŞ-nyň garaşsyzlygynyň 249 ýyllygy mynasybetli dabaraly kabul edişlik guraldy.

Çärä hormatly myhmany hökmünde Türkmenistanyň Mejlisiniň Başlygy Dünýägözel Gulmanowa gatnaşdy.

ABŞ-nyň ilçisi Elizabet Rud çykyşynda Amerikanyň Birleşen Ştatlary bilen Türkmenistanyň arasyndaky gatnaşyklaryň yzygiderli ösdürilýändigini belledi.

«Geçen hepde ABŞ-nyň Döwlet sekretary Marko Rubio bilen Türkmenistanyň daşary işler ministri Raşid Meredowyň arasynda geçirilen telefon arkaly söhbetdeşlikde nygtalyşy ýaly, Amerikanyň Birleşen Ştatlary Türkmenistanyň özygtyýarlylygyna we garaşsyzlygyna çuňňur hormat goýýar. Türkmenistanyň hemişelik Bitaraplyk syýasaty umumy başlangyçlarymyzda we tagallalarymyzda ýol görkeziji ýörelge bolup çykyş edýär hem-de ýurduň sebit hyzmatdaşlygynda we durnuklylygyň üpjün edilmeginde oňyn rol oýnamagyna mümkinçilik berýär. Biz ikitaraplaýyn hyzmatdaşlygymyz, şol sanda «C5+1» formatyndaky dialog arkaly ykdysady, bilim we medeni gatnaşyklarymyzy ösdürýäris, şeýle hem serhet howpsuzlygyny güýçlendirmek, tebigy betbagtçylyklara garşy çäreleri durmuşa geçirmek hem-de sebit we ählumumy meseleleri çözmek ugrunda bilelikde işleýäris» diýip, ABŞ-nyň ilçisi aýtdy.

Öz gezeginde Dünýägözel Gulmanowa gutlag çykyşynda türkmen-amerikan hyzmatdaşlygynyň hil taýdan täze derejä çykandygyny nygtady. Bu ähli ugurlardaky özara gatnaşyklara degişli bolup, aýratyn-da, BMG-niň çäklerindäki hyzmatdaşlyk ýokary netijeliligi bilen tapawutlanýar.

«Türkmenistan tarapyndan öňe sürülen umumadamzat gymmatlyklaryny berkitmäge gönükdirilen başlangyçlara ABŞ-nyň hemişe goldaw berýändigi we bilelikde awtordaş bolup çykyş edýänligi üçin minnetdarlyk bildirýäris» diýip, Türkmenistanyň Mejlisiniň Başlygy belledi.

Çäräniň myhmanlary üçin dürli dynç alyş we güýmenje ýerleri, surata düşülýän künjekler guralyp, amerikan tagamlary hödürlenildi.

Baýramçylyk agşamynyň dowamynda amerikan kantri-rok topary we aýdymçy Jessika Linn joşgunly aýdymlary ýerine ýetirdiler. Olar bilen bilelikde türkmen aýdymçylary hem çykyş etdiler.

Ýeri gelende ýatlatsak, aşgabatlylar we paýtagtyň myhmanlary 5-nji we 6-njy iýulda amerikan kantri-rok toparynyň we Jessika Linniň konsertlerine tomaşa edip bilerler.